Gina-review na sang opisina ni Iloilo City Councilor Rudolph Ganzon ang mga ordinansa sa syudad sang Iloilo kaangot sa mga pedestrian lanes agud mabalanse ang safety sang pedestrian kag sang mga motorista.
Antes gin-revisit ini nga mga ordinansa, may yara na sang go-signal nagikan kay Iloilo City Mayor Jerry Treñas.
Sa interview sang Bombo Radyo kay Ganzon, iya ginpahayag nga kun kinahanglanon, dugangan, ipabilin, ukon kakason ang indi kinahanglan nga pedestrian lanes depende sa mangin assessment.
Partikular nga gintumod ni Ganzon ang nakabutang sa Regulation Ordinance No. 2009-217 kun sa diin sa Benigno Aquino Jr. Avenue ukon Diversion Road sa Mandurriao, tatlo ang pedestrian lanes nga nahamtang sa vicinity sang entrance sa Barangay Bakhaw; isa sa vicinity sa intersection sa San Rafael Road; kag isa sa vicinity sang atubang sang St. Joseph School.
Sandig naman sa Regulation Ordinance No. 2012-035, sa Mandurriao gihapon, may gindugang nga lanes apang nahamtang sa Q. Abeto St. sa atubang sang Santa Isabel International School Inc.
Suno kay Ganzon, tuman ka damo nga tawo ang nagatabok-tabok diri nga lugar bangud madamo sang mga establisyemento apang delikado bangud layuanay ang pedestrian lanes.
Ginbalikan man ang natabo sang Hunyo 2019 sang napatay ang mag-asawa nga public school teachers matapos nabungguan sang salakyan samtang nagatabok sa pedestrian lane sa amo nga national highway.
Antes sini nga lihok ni Ganzon, talalupangdon man ang iban nga mga tawo sa amo nga dalan nga nagataklas pa sa baral sa tunga sang dalan bangud nalayuan nga magtultol sa pedestrian lanes.
