Naglab-ot sa kabug-usan nga 2,200,731 ka mga pamilya ukon 8,630,663 ka mga indibidwal ang naapektohan sang tropical cyclones Kristine kag Leon.
Suno sa National Disaster Risk Reduction and Management Council (NDRRMC), ang apektado nga populasyon yara sa 12,053 ka mga barangay.
Naglab-ot naman sa 227,133 ka mga persona ukon 56,396 ka mga pamilya ang nagpangayo sang temporary shelter kag ginpahamtang sa 1,467 ka mga evacuation centers, samtang 521,858 ka mga indibidwal ukon 108,941 ka mga pamilya ang nagtinir sa guwa sang mga evacuation centers.
Nagapabilin sa 146 ang napatay, kag 126 ang dapat pa nga i-validate.
Samtang 130 naman ang napilasan kun sa diin 120 diri ang padayon nga gina-validate.
Baynte ka tawo ang nagapabilin nga missing tubtob subong nga Domingo.
Naapektuhan nanday Kristine kag Leon ang 858 ka mga seksyon sang dalan kag 110 ka mga taytay. Sugod subong nga adlaw, 703 ka mga dalan kag 92 ka mga taytay ang sarang na maagyan.
Sa 367 ka mga syudad kag munisipyo nga nadulaan sang kuryente, 323 na ang nabalik.
Samtang, sa 50 ka mga syudad kag munisipalidad nga apektado ang ila supply sang tubig, 43 diri ang nabalik ang serbisyo sang tubig.
Sa subong, suno sa iya tally, 750,196 ka pamilya ukon 34.63% sang pamilya nga apektado ang nabuligan na.
Ang mga local government units kag regional agencies ang nahatagan sang ayuda nga nagabalor sang P2,549,371.31.
Gindeklarar ni Presidente Ferdinand Marcos Jr. ang Lunes, Nobyembre 4, 2024, bilang Day of National Mourning para sa mga biktima sang mabaskog nga ulan, pagbaha, kag mabaskog nga hangin nga dala sang Severe Tropical Storm Kristine (international name: Trami).
