DUMANGAS, ILOILO – Masobra 36 ka oras na nga stranded ang ginatos ka mga pasahero sa Dumangas Port sa Dumangas, Iloilo bangud sa Bagyo Tisoy.
Sa interview sang Bombo Radyo kay PO1st Romulo Sancio, Coast Guard Station Commner sa Dumangas, Iloilo, iya ginpahayag nga umpisa sang ginpaidalom sa typhoon signal number 1 ang Iloilo, gilayon nga ginpa untat ang byahe sang Roll-On-Roll-Off vessel.
Suno kay Sancio, halos sa mga pasahero nga na stranded ang papauli na kuntani sa Bacolod kag iban pa nga mga lugar.
Ginabanta 300 ka mga pasahero ang nagapabilin nga stranded sa Dumangas port sa diin may yara man sang assistance center sa lugar agud nga mahatagan sang pagtamod ang kinahanglanon sang mga pasahero.
Samtang nagkuha lamang sang Criminology Licensure Exam si Kenneth Antoque sa Iloilo kag mapauli ini kuntani gilayon sa Murcia apang wala ini madayon bangud sa bagyo.
Suno kay Antoque, madamo sila nga mga examinees ang na stranded sa Dumangas port humalin pa sang Dominggo nga adlaw.
Nagabayad lamang sila sang P10 sa guwa sang port agud nga makapaligo adlaw-adlaw.
Dugang pa sang natungdan, ginapadal-an lang siya sang iya magulang sang kwarta agud nga may ibakal man sang iya mga kinahanglanon samtang nagapabilin sa Dumangas Port.
