ILOILO – Ginalauman nga makabenepisyo sang dako ang mga pumuluyo sa tion nga makasulod na ang MORE Electric and Power Corporation (MORE Power) sa Iloilo Province.
Sa interview sang Bombo Radyo kay Iloilo 2nd district Rep. Michael Gorriceta, nga amo ang nagduso sang hagna sa Kamara, iya ginpahayag nga ginapamatian niya ang reklamo sang mga pumuluyo sa serbisyo sang Iloilo II Electric Cooperative, Inc.
Suno kay Gorriceta, ini ang nagtulod sa iya agud magduso sang hagna para sa 25-year power utility franchise sang MORE Power nga nag-lapse na bilang layi sang July 30.
Sa idalom sang Republic Act 11918 ukon modified MORE Power franchise, nasaad nga mahimo na maghatag ang MORE Power sang electricity services sa Syudad sang Iloilo kag Passi; kag mangin sa banwa sang Alimodian, Leganes, Leon, New Lucena, Pavia, San Miguel, Santa Barbara, Zarraga, Anilao, Banate, Barotac Nuevo, Dingle, Duenas, Dumangas kag San Enrique.
Ang mga service areas nga ginhatag sa MORE Power ang ginalakipan sang mga lugar nga naserbisyuhan man sang Iloilo Electric Cooperatives (ILECO) I kag III – ang power utilities nga naghatag sang kuryente sa mga consumers sa sulod na sang pila ka dekada.
Pinaagi sini suno sa mamalidha, may yara sang friendly competition sa tunga sang ILECO kag MORE Power sa paghatag sang maayo nga serbisyo kag magatanyag sang barato nga sukot sa per kilowatt-hour.
Matandaan nga nangin kontrobersyal ang pag-take over sang MORE Power sa power distribution assets sang private firm nga Panay Electric Company (PECO) santo man sa ruling sang Supreme Court.
Ang RA 11918 ang isa lang sa mga hagna nga wala na-veto ni President Ferdinand Marcos Jr. matapos nabilin nga pending sang Duterte administration.
