GUIMARAS – Ginpalab-ot sang mga tricycle drivers ang ila mga reklamo sa probinsya sang Guimaras kaangot sa pagdumili sa ila nga magbyahe sa national highways.
Ini ang kasunod sang Memorandum Number 2020-004 sang Department of the Interior and Local Government (DILG) ukon ang mandu nga nagapahayag: “Prohibiting Tricycles, Pedicabs, and Motorized Pedicabs from Operating on National Highways.”
Sa pagsinapol nga ginpatigayon, madamo sang ginpalab-ot nga hibubun-ot ang mga mga driver ilabi na bangud posible nga madulaan sang pangabuhian ang ginabanta mga 150-200 sa ila.
Sa interview sang Bombo Radyo kay Jordan Sangguniang Bayan Member Grace Palomo, chair sang Committee on Transportation sa banwa sang Jordan, iya ginpahayag nga ang Highway Patrol Group (HPG) kag ang Local Government Unit (LGU) sa Guimaras ang naga-implementar lang sang layi, nagasunod sa guidelines, kag wala man sila sang mahimo bangud mandu ini sang DILG.
Suno pa sa natungdan, naintindihan gid nila ang sentimyento sang mga tricycle drivers bangud sa pagkamatuod, ang mga tricycle ang mayorya kag pinakamatawhay nga means of transportation para sa mga turista nga nagabisita sa probinsya sang Guimaras.
Gin-ako man sang opisyal nga apektado ang turismo sang ila probinsya bangud sang nasambit nga pagdumili kag pagregulate sa mga tricycle drivers.
Paandam ni Palomo, ginapa-intindi lang nila ang layi kun diin kutob ang prangkisa sang mga drivers kag risgo na nila kun indi nila pagsundon ang otoridad.
Pahayag pa sang natungdan, may mga masunod pa nga pagsinapol nga patigayunon para sa mga transport groups kaupod ang Guimaras Provincial Government.
