ILOILO CITY- Gin-athag sang Local Economic Enterprise Office sang Concepcion, Iloilo nga wala hungod nga ginpanghaboy ang nakit-an nga mga patay nga tuloy sa higad sang baybay.
May kaangtanan ini sa maeksperyensiyahan nga oversupply sang amo nga isda humalin pa sang Agusto tubtob subong nga bulan.
Sa interview sang Bombo Radyo kay Former Sangguniang Bayan Member Gilbert Francisco, head sang Local Economic Enterprise Office sang banwa, iya ginpahayag nga ang nakit-an nga mga tuloy amo ang nagaawas sa lambat sang mga manugpangisda.
Suno kay Francisco, bangud tuman ka damo ang isda, indi ini makaigo sa ila suludlan gani nga madamo ang sobra.
Suno sa iya, kun may mga sobra gid man nga mga isda, ginalubong ini nila agud indi magbaho.
Nahibaluan nga bangud sa oversupply, nagalab-ot nalang sa P50 tubtob P100 ang isa ka banyera sang tuloy.
