Lain nga lebel sang panibag-o nga bayolasyon ang ginhimo sang People’s Republic of China sang ginsulod sang military aircraft sini ang airspace sang Japan sa labing-una nga tion.
Ginkumpirma mismo sang Japanese Defense Ministry nga isa ka Chinese military aircraft ang iligal nga nagsulod sa territorial airspace nga sakop na sang Danjo Islands sa Nagasaki Prefecture sa Japan.
Base sa ministry, ang nag-trespass amo ang “Y-9 intelligence-gathering” aircraft kag natabo ini 11:29 am (local time sa Tokyo) kag naglawig sang halos duha ka minutos.
Wala pa sang ginpaguwa nga official statement ang Chinese authorities kaangot diri.
Madasig man nga gingamit sang Japan ang ila fighter jets nga ginapreparar sa tion sang emerhensya.
Ini ang first incursion sang Chinese military aircraft sa airspace sang Japan nga ginbalusan sang mga Japanese sang warnings. Gin-athag man sang ministry nga wala sila naggamit sang weapons kaangay sang flare guns sang nag-isyu sila sang alert sa aircraft sang Beijing.
Antes sini, matandaan nga na-involve man ang Japanese kag Chinese vessels sa tensyonado nga mga insidente sa disputed areas ilabi na sa Senkaku islands sa East China Sea nga ginatawag sang Beijing nga Diaoyus.
Nangin agresibo pa gid ang Beijing sa ila pag-claim sa amo nga isla sini lang nga mga tinuig rason kun ngaa gin-report sang Tokyo nga may ginpadala na ang China nga coast guard vessels, naval ship kag mangin nuclear-powered submarine.
