Gintugutan na ni Agriculture Secretary Francisco Tiu Laurel, Jr. ang importasyon sang gatas kag iban pa nga milk products halin sa Thailand, Russia, South Korea, kag Libya.
Matandaan nga may ginpatuman anay nga ban sa pagsulod sang baka kag buffalo kag ila produkto kag by-products halin sa nasambit nga apat ka mga pungsod bangud sa pamahog dala sang lumpy skin disease.
Sa ginpaguwa naman nga Memorandum Circular nga naga-amyendar sang Memorandum Order No. 6, ginsaad nga magluwas sa pag-import sang gatas kag milk products, mahimo man maka-import sang meal kag flour halin sa dugo, karne kag iban pa nga skeletal muscle ukon tul-an, hides kag iban pa nga produkto halin sa baka kag water buffaloes sa apat ka mga pungsod — sa idalom sang kondisyon nga makakuha ang importers sang veterinary certificate halin sa pungsod nga maga-export.
Ginpaathag man ni Laurel nga ang ban anay sa baka kag buffaloes halin sa Thailand, South Korea, Russia kag Libya ang kinahanglanon gid agud malikawan ang pagsulod sang lumpy skin disease sa Pilipinas nga sarang man makaapekto sa ikaayong lawas sang local nga populasyon sang baka kag buffalo.#
