Madamo sa aton ang nagahandum nga mangin milyonaryo.
May ara man nga nagalahog nga kun indi pag-swertehon, at least mamana ukon mangasawa na lang sang milyonaryo ukon milyonarya.
Pero ano ayhan ang kabuhi kun ikaw ang nakasal sa isa ka multi-millionaire?
Ginpakigbahin ini sang isa ka sikat nga social media influencer sa Dubai, United Arab Emirates nga si Soudi Al Nadak nga tatlo ka tuig na nga kasado sa manggaranon nga tawo nga si Jamal Al Nadak.
Ginpasid-ing sang 26-anyos nga influencer ang iya kabuhi sa iya masobra 420K followers sa Instagram.
Pahayag sini, may istrikto nga mga pagsulundan sa iya bilang asawa kaangay sang pagdala sang bag nga dapat terno gid sa iya sapatos.
Indi man siya pwede mag-obra bangud ang iya bana na ang bahala sa tanan nga balayran.
Wala man siya nagaluto bangud adlaw-adlaw man sila nagakaon sa guwa.
Dapat man suno kay Soudi nga pretty siya pirme, kag para ma-achieve ina, adlaw-adlaw man nga gina-asikaso sang professional ang iya buhok kag make-up.
Ginpahayag sini nga Soudirella ang tawag sa iya bangud siya ang Princess ni Jamal.
Ari pa gid ang pwerte nga pagsulundan: indi siya pwede makapakig-abyan sa kay bisan sin-o nga lalaki!
Naangot man sa sini nga rule ang natabo sang nagligad lamang nga Septyembre.
Ginsugid ni Soudi sa iya bana nga luyag sini magsuksok sang bikini, kag nakahibalo ka bala kun ano ang ginhimo sang mister?
Ay abaw, para maka-bikini wear ang misis, ginbaklan niya ini sang iya kaugalingon nga isla.
Adlaw-adlaw man nga ginapakita ni Soudi sa iya followers ang iya lifestyle kag kun daw ano sila ka manggaranon rason nga madamo ang nagamuno nga wala na sila nanamian.
May mga nagakomento nga boring katama ang kabuhi sini kag daw kaangay nga napreso siya sa isa ka bulawan nga hawla bangud sa mga pagsulundan sa ila balay.
Taga-Sussex, England gid si Soudi kag nakasaylo lamang sa Dubai ang iya pamilya sang naga-edad siya sang sais anyos. Nagkilalahay sila ni Jamal sa university sa Dubai kag tatlo ka tuig na sila nga kasado.
