Magabisita sa Pilipinas ang Miss Universe Continental Queens sa Abril 26 kag magatinir sa pungsod tubtub sa Mayo 3.
“Don’t miss your chance to witness beauty, grace, and empowerment as these queens represent their continents and celebrate diversity across the globe,” suno sa Miss Universe organization.
Antes sa Pilipinas, magabisita anay ang apat ka mga reyna sa Thailand halin sa March 31 tubtub sa April 25.
Natalana pa nga ipaguwa ang dugang nga mga detalye sa tour.
Nahibaluan nga ang apat ka queens ang ginhatagan sang continental titles sang 2024 agud mag-represent sang continental groups.
Ang tiglawas sang Pilipinas nga si Chelsea Manalo amo ang napilian nga una nga Miss Universe Asia apisar nga nagtakop ang iya Miss Universe stint sa Top 30. Nadag-an man ni Chelsea ang Best in National Costume award sa iya “Hiraya” costume sa ginpatigayon nga global pageant sa Mexico.
Ang tatlo ka iban pa nga queens amo sanday Miss Africa & Oceania Chidimma Adetshina halin sa Nigeria; Miss Europe & Middle East Matilda Wirtavuori halin sa Finland; kag Miss Americas Tatiana Calmell halin sa Peru.
Balantayan naman ang koronasyon sang Miss Universe Philippines 2025 sa Mayo 2, 6 p.m., sa Mall of Asia Arena sa Pasay City.
