Nagapati ka man bala sa ghost ukon murto?
Sa Aliaga, Nueva Ecija, viral ang video nga gin-upload sang isa ka netizen bangud sa baylo nga kahadlukan ang ila bomba nga nagmato-mato sa pagtubod sang tubig, ginkalipay pa niya ini bangud indi na siya mabudlayan sa pagsag-ob.
Suno kay Jonathan Abad Grospe, gab-i na sang amo nga tion kag naga-isahanon lang siya sa ila balay sang ginkakibot niya nga naga-alawas na ang tubig sa ila labador bangud kaangay nga may naga-bomba sang tubig apisar wala sang tawo.
Sa baylo nga kahadlukan, ginkuhaan pa ni Grospe sang video ang tumalagsahon nga hitabo kag gin-upload ini sa iya Facebook.
Nagapati ang natungdan nga posible guba na ang ila nga bomba bangud daan naman ini.
Sa subong, may masobra 125,000 ka shares na ang amo nga video.
Nagbubo naman ang mga komento sang netizens kaangay sang kuntani magsaylo man ang murto nga naga-bomba sang tubig sa ila lugar agud indi naman sila mabudlayan sa pagsag-ob sang tubig sa tion nga sila ang magpaligo ukon manglaba.
