ILOILO CITY- Dako ang pagpati sang More Electric and Power Corporation nga mangin basehan sang lower court ang pag-isyu sang Temporary Restraining Order sang Supreme Court en banc agud magpagwa sang desisyon tuhoy sa Application for the Issuance of the Writ of Possession.
Sa interview sang Bombo Radyo kay Mr. Roel Castro, Presidente sang More Electric and Power Corporation, iya ginpahayag nga ang ginpagwa nga TRO sang korte suprema nga nagadumili sa Mandaluyong RTC kag Panay Electric Company sa pagpatuman sang desisyon nga napetsahan Hulyo 1, 2019 ang nagapakita nga ang MORE Power ang may yara sang maathag nga kinamatarung nga maprotektahan; may yara sang material kag substantial invasion sang nasambit nga kinamatarung; may yara sang urgent need para sa writ agud malikawan nga indi makaayo nga damage sa MORE Power; kag wala sang ordinaryo, madasig kag bastante nga remedyo agud malikawan ang damage sa More Power magluwas sa pag-isyu sang Temporary Restraining Order.
Suno kay Castro, maathag nga pamatuod sang gahum sang layi sa diin ang Republic Act 11212 nga nagahatag sa MORE Power sang iya prangkisa ang regular nga napasar sa kongreso kag ginpirmahan sang presidente agud mangin layi.
Ginpahayag ni Castro nga sa pihak sang legalidad sang layi, ginagamit gihapon sang Panay Electric Company ang desisyon sang RTC Mandaluyong nga nagadeklarar nga void kag unconstitutional ang Sections 10 kag 17 sang R.A. No. 11212 agud magtuga sang pagsalangisag sa pagpatigayon sang hearing para sa Expropriation Case sa RTC Iloilo City.
Dugang man niya nga maathag ang pagsulundan kag layi nga sa tion nga makompleto ang tanan nga requirements, ang petitioner sa isa ka expropriation case ang nagakadapat nga hatagan sang writ of possession bilang kinamatarung kag ini ang ministerial nga katungdanan sang trial court nga gilayon mag-isyu sang writ of possession.
Samtang, wala pa nabaton sang Panay Electric Company ang kopya sang nasambit nga Temporary Restraining Order.
Apang suno kay Mr. Marcelo Cacho, Adminstrative Manager sang Panay Electric Company, gilayon sila nga maga-file sang motion for reconsideration para sa pag-lift sang Temporary Restraining Order.
Ginpahayag ni Cacho nga wala sa gihapon maresolba ang isyu sang constitutionality sang expropriation.
Dugang pa niya, indi dapat pagkabigon sang More Electric and Power Corporation nga maapektuhan sang nasambit nga Temporary Restraining Order ang nagapadayon nga expropriation proceedings sa Iloilo Regional Trial Court.
