Naghingyo ang motorcycle riders sa Iloilo City Government nga maghimo sang talaksan sa pagdakop sa mga driver nga nagagamit sang modified mufflers nga amo ang nagatuga sang noise pollution.
Nahibaluan nga sa idalom sang anti-muffler ordinance sang syudad, ginadagdagan sang multa tubtob sa P5,000 ang mga driver nga naga-‘revolution’ sa dalanon kag nagagamit sang modified mufflers.
Ginakumpiska man ang modified mufflers halin sa mga driver nga nagagamit sini.
Sa interview sang Bombo Radyo kay Dante Pamonag, national adviser sang PhilBikers, iya ginpahayag nga kuntani may ginagamit ang otoridad nga decibel meter ukon device nga amo ang isa ka measuring instrument nga nagatumod sa lebel sang katunugon.
Sa sini nga paagi, mangin patas ang pagdakpanay sa mga nagagamit sang modified mufflers.
Ini bangud may mga motor nga may yara sang matunog nga pipes apang indi man iskandaloso ang tunog sini.
Suno kay Pamonag, indi malikawan nga may yara gid man sang mga dungol nga motorista nga wala nagasunod sa pagsulundan sang syudad kag nagatuga sang disturbo sa palibot.
Apang suno sa natungdan, may yara sang mga pulis nga daw kaangay nga nagagamit lamang sang ila mga dulunggan bilang basehan sa pagpangdakop kag pagpangkumpiska sang tambutso.
Panawagan sang natungdan sa mga otoridad, kuntani mangin patas man kag mag-gamit sang nagakaigo nga talakasan kag kategorya sa pagpangdakop.
