Ginpanindugan sang Movie and Television Review and Classification Board (MTRCB) nga pinal na ang X rating nga ginhatag sini sa pelikula nga “Dear Satan.”
Bida sa sini nga Christmas-themed movie ang actor nga si Paolo Contis kag ang child star nga si Sienna Stevens.
Sang una nga nagpaguwa sang desisyon ang review body, gin-islan sang production team ang title sang pelikula sa “Dear Santa” para nga mas ma-reflect ang mensahe sini nga gusto ipalab-ot sa audience. Apisar sini, wala gin-islan sang review body ang ila desisyon kag X ini gihapon — buot silingon, indi ini pwede ipakita sa mga sinehan.
Gin-cite sang MTRCB nga nalapas sang film ang Presidential Decree No. 1986 (PD 1986) kun sa diin ginadumilian ang exhibition sang films kag TV shows nga may pagpang-atake sa rasa, pagpati, ukon relihiyon.
Suno kay MTRCB Chairperson and Chief Executive Officer Lala Sotto-Antonio, base sa review sang committee, nagagguwa gid nga “distorted” ang depiction kay Satanas kag wala ini nagsanto sa mga ginatudlo kag pagpati sang mga Kristiyano kag Simbahan.
“The Committee that reviewed the film found that the material depicts Satan as capable of transformation, saying it is a distortion of Catholic and Christian teachings. The review committee said the film’s narrative, which presents the possibility of Satan being redeemed, is deceiving to the eyes of the viewers,” suno sa agency.
Ang “Dear Satan” amo ang istorya ni Satan (Contis) nga aksidente lang nga nakabaton sang sulat halin sa bata nga para kuntani kay Santa Claus. Nagpakig-abyan ini sa bata (Stevens) kag nagtinguha ini nga impluwensyahan ang bata nga mangin malain, apang nagpabilin nga inosente kag mabuot ang bata.#
