Liwat nga nahambalan sa social media ang ginaalegar relasyon sang aktres nga si Kathryn Bernardo kay Lucena City Mayor Mark Alcala matapos nakit-an sila nga magkaupod sa Thailand.
Spotted ang rumored couple nga magka-holding hands samtang yara sa Suvarnabhumi Airport sa Bangkok sang Marso 31.
Gin-share man sang fan pages ang pictures. Makit-an nga all-smiles ang duha samtang naga-istorya sa ila mga upod.
May nagaguwa man nga reports nga yara na sanday Kathryn kag ang alkalde sa Thailand sa sulod na sang isa ka semana kag lakip sa ila nabisitahan amo ang Chiang Mai kag Bangkok antes ang ila masunod nga destinasyon (nga ginapahayag Bhutan) para sa camping trip.
Sa separado nga Instagram video ni Kathryn sang Abril 3, ginpakita sini ang pila ka videos sang ila byahe sa Thailand kaupod ang iya glam team.
“Tom yum is life,” pahayag sini sa caption nga nagatumod sa Thai dish nga iya ginkaon sa amo nga Southeast Asian country.
Indi ini ang una nga tion nga nakit-an sila nga magkaupod.
Spotted man anay ang rumored couple sa Ninoy Aquino International Airport, sa upscale restaurants, kag sa iban pa nga mga lokasyon sa Pilipinas, apang ang pictures sa Thailand ang ginasiling sang netizens nga “most telling” ukon pa-“soft launch” sang duha.
May fans nga nagpabutyag sang kalipay para kay Kathryn samtang may iban naman nga napataas-kilay ilabi na sa nature sang trabaho ni Alcala bilang local government official nga ginalauman nga magatungod sang iya responsibilidad sa iya syudad ilabi na sa tunga sang sampaw-sampaw nga mga epekto sang socio-economic crisis.
2025 pa sang nagguwa ang dating rumors kanday Kathryn kag Alcala, apang wala pa sang official confirmation ukon denial halin sa magtimbang nga kampo.#
