Halos tanan sa aton ang nakaeksperyensya nga ma-late na sa aton kaladtuan, trabaho kag eskwelahan sa diin daw makasiling ka nalang nga ‘baw kun pwede ko lang palupadon ang akon salakyan ukon kotse nga ginasakyan’.
Ini man ang ginahandom sang iban ilabi na kun daw indi maagwantahan ang traffic sa dalanon.
Ang mga nagalupad nga salakyan ukon kotse ang masami makit-an lang naton sa mga science fiction nga pelikula ukon sa libro.
Apang sa Slovakia, Europe, indi na ini nagapabilin nga handom lamang bangud may Slovakian company nga nag-imbento sang pinakauna nga prototype flying car kag ginpalupad ini sa duha ka mga syudad agud testingan.
Nagdangat sa 35 ka minutos ang paglupad sa kahanginan sang AirCar Prototype 1 nga kotse sa diin yara sa 118 Miles per hour ang kadasigon sini.
Ang amo nga AirCar nga may 160 horsepower BMW engine, ang gindisenyo bilang sports car sa diin may yara ini sang button-operated process.
Suno sa kompaniya, may yara man sila sang ginadevelop nga AirCar Prototype 2, nga maga-feature sang 300 horsepower engine sa diin ginalauman nga maglupad ini sa kadasigon nga 186 Miles per hour nga may range nga 621 miles.
Kun ikaw, handom kag luyag mo man bala nga makasakay sa nagalupad nga kotse sa diin wala sang trapiko kag aso?
