Nakibot na lang ang tag-iya sang salakyan nga ginpaarakan sang tiro sa Poblacion A, Duenas, Iloilo nga upod sa nagsakay si Marigold Jamelo sa pick-up nga ginpa-drive sini sa iya mekaniko nga si Wilber Auditor.
Ini bangud sang pagkuha sini sa ila balay ang sakay lamang sini amo si Wilbert kag helper sini nga si Gerry Pampag.
Sa interview sang Bombo Radyo kay Alyas Ann, tag-iya sang salakyan, iya ginpahayag nga ginhulam ni Wilbert nga mekaniko sini ang salakyan agud nga i-drive test kag ipakay-o ang aircon.
Suno pa sa iya nga nakibot na lang ini sang nagpanawag si Wilbert sa iya nga gintiro ang salakyan sini.
Ginpahayag man sini nga amo sini ang una nga bes nga natabo ang nasambit nga insidente kag nadalahig ang iya salakyan.
Ginpanginwala naman sini nga siya ang target sang pagpangtiro bangud suno pa sa iya nga wala man ini sang kontra kag ginagamit pa sini ang salakyan nga magkadto sa nagkalain-lain nga lugar sa Iloilo.
Samtang, nagapati naman ang isa sa nagresponde sa insidente nga si Alyas Ronie nga ang target sang nasambit nga shooting insident amo ang babayi nga si Marigold Jamelo.
Sa interview sang Bombo Radyo, iya ginpahayag nga sunod-sunod nga lupok sang pusil ang ila nabatian sa lugar kag sang pagkadto na nila sa ginluntaran sang insidente, ato na kag ila nasaksihan nga nagadunglay na lang ang ulo sang biktima nga si Marigold kag wala na ini sang kabuhi.
Suno pa sa iya nga nakaagom lamang sang gamay nga pilas ang kaupdanan ni Jamelo.
Ginpahayag man ni Alyas Ronnie nga bangud sa pagka-abriya sang salakyan, nagpundo anay ang mga ini sa talyer, wala naman naglaom ang mga biktima nga may magdulog nga pula nga awto malapit sa ila nahamtangan kag paulanan ang mga ini sang tiro.
Dugang pa ni Alyas Ronie nga kun ang target kuntani sang suspek ang iban pa nga sakay sang salakyan wala tani ginpatam-an sang luthang ang babayi nga si Marigold.
Nahibaluan nga na-rekober sa lugar ang 23 ka mga empty shells nga ginapatihan bala sang M16.
Dugang pa diri, nadala man sa naigo nga pagpangtiro ang tag-iya sang talyer kun sa diin natabo ang insidente kag sa karon upod kay Wilbert kag Gerry ginalapatan na sang pagbulog sa ospital.
