ILOILO CITY – Hugot ang pagpahanumdom sang National Police Commission (NAPOLCOM) sa Philippine National Police (PNP) nga sundon ang pagsulundan sa pagpatigayon sang ‘security measures’ tubtub nga matapos ang May 13 midterm elections.
Sa interview sang Bombo Radyo kay NAPOLCOM-6 Director Atty. Joseph Celis, iya ginpahayag nga may yara sang ginapatigayon nga checkpoint, inspection kag iban pa nga peace and order measures ang PNP agud nga matapna ang anu man nga sahi sang kalakasan tubtub nga matapos ang election period.
Kadungan sini, ginpahanumdum ni Celis ang tanan nga PNP personnel nga dapat sundon lang ang nagakadapat nga proseso kag indi gid magpagamit sa pulitiko agud nga malikawan ang kontrobersiya.
Indi man malikawan suno kay Celis nga may yara sang magapalab-ot nga reklamo batok sa PNP apang kinahanglan nga may yara sang written complaint kag pamatuod bag-o mag-aktu ang NAPOLCOM.
Sa bahin naman sang reklamo tuhoy sa ginapahayag pagserbe sang Iloilo Police Provincial Office (IPPO) nga ‘goons’ sa iban nga pulitiko, ginpahayag sang NAPOLCOM Regional Director nga nagakadapat nga may yara sang pamatuod agud nga mapasabat si IPPO Director Police Col. Marlon Tayaba.
Nakadepende na suno sa natungdan sa NAPOLCOM kun bala may bug-at ang reklamo ukon wala.
Kadungan sini, ginpromisa man niya nga mangin patas ang NAPOLCOM sa pagpatigayon sang imbestigasyon.
NAPOLCOM-6 Director Atty. Joseph Celis
