Ginguba ni Lakers superstar LeBron James ang record sang National Basketball Association (NBA) legend nga si Michael Jordan sa 30-point games.
Natabo ini sa hampang sang Los Angeles batok sa Atlanta Hawks, 119-102.
Nalab-ot ni James ang at least 30 points sa regular season nga amo na ang ika-563 sa iya nga karera nga lapaw na sa record nga gin-establisar ni Jordan sang 2003.
Na-set ni Jordan ang iya record sa 1,072 games sa masobra 15 ka seasons, samtang nahimo naman ini ni James sa iya ika-1,523 nga appearance sa masobra 22 seasons.
Tuman naman ang kalipay ni LeBron bangud idolo sini si Jordan halin sa iya pagdaku sa Akron, Ohio kag suksok sini ang jersey number 23 bangud sa amo nga basketball great.
Matandaan nga nalapawan man anay ni LeBron si MJ sa ikaapat nga pwesto sa career scoring list sa NBA sang March 2019, kag sang amo nga tion, naghibi gid ang Lakers star samtang yara sa bench.
Ini na ang pang-22 nga season sang 40-anyos nga Lakers forward sa liga apang wala pa ini sang paghinay kaangay sang 38 puntos nga iya ginpaulan batok sa Portland.
Tatlo lamang ka players sa NBA history ang nakaskor sang at least 30 points sa NBA game apisar lapaw na sa 40 anyos ang edad.
Apat ka beses ini nga nahimo ni Jordan, isa ka bes para kay Dirk Nowitzki, kag duha ka beses na nga nahimo ni James sa nauna nga lima ka adlaw sa iya pagtungtong sa 40 years old.
