Natalana nga pirmahan na ni President Ferdinand Marcos Jr. subong nga adlaw, Hunyo 13, ang hagna nga ginduso agud nga matukod ang Negros Island Region (NIR).
Sa inisyal nga impormasyon, matabo ang ceremonial signing sa Malacañang ‘las dos karon sa hapon kun sa diin imbitado si Negros Occidental Gov. Eugenio Jose Lacson para masaksihan ang pagpirma sa Senate Bill No. 2507 kag House Bill No. 7355 ukon “An Act Establishing The Negros Island Region”.
Ini nga rehiyon ang bug-usan sang Negros Occidental, Negros Oriental, kag Siquijor.
Ang Negros Occidental ang nalakip pa subong sa Western Visayas, samtang napaidalom naman sa Central Visayas ang Negros Oriental kag Siquijor.
Sa Kamara, ang gin-file nga hagna agud matukod ang separado nga isla ang ginduso tanan sang representatives halin sa Negros Island kag Siquijor.
Una diri, nagpahayag na ang Negros Island officials kag business leaders nga kun mapirmahan na ang Negros Island Region bills kag mahimo nga layi, isa ini katumanan sang handum kag isa man ka sahi sa pagtib-ong sang local economy paagi sa integrated development.
Una nga naestablisar ang Negros Island Region sang 2015 paagi sa Executive Order 183 ni anay Presidente Benigno Aquino Jr. apang gin-abolish ini sang Agusto 7, 2017 sang tion naman ni anay Presidente Rodrigo Duterte bangud sa isyu sa pondo.
Indi tanan ang pabor sa sini nga hagna lakip na si Dumaguete Bishop Julito Cortes nga una na nag-apelar kay Marcos nga i-veto ini nga tikang.
