Ginkumpirma sang Bureau of Jail Management and Penology (BJMP) nga ginpaguwa na sa detention ang aktres kag negosyante nga si Neri Naig alas sais kagab-i, Disyembre 4,
Ginserbe ang court order para sa iya release sa isa ka ospital kun sa diin nagpaidalom siya sa medical evaluation.
Nobyembre 23 sang gindakop ang actress-entrepreneur bangud sa kaso nga syndicated estafa kag violation sang Securities Regulation Code.
Gilayon nga nag-file ang iya kampo sang motion to quash batok sa warrant of arrest bangud sa argumento nga wala gid ginpahibalo ang aktres nga may alegasyon kag complaint batok sa iya.
Sini lang nga Miyerkules, gin-grant sang Pasay City Regional Trial Court ang motion kag ginsugo ang Office of the Prosecutor nga mag-imbestigar liwat kaangot sa kaso.
Natukiban sa court documents nga gin-isyuhan sang subpoena si Neri halin sa prosecutor’s office apang gindul-ong ini sa sala nga address.
Bangud sini suno sa korte, ang kakulang sa nagakaigu nga notice ang nagalapas sa constitutional right sini sa due process of law kag naga-invalidate sa preliminary investigation nga una gin-conduct sang prosecutors.
Kadungan sang desisyon, gin-deny sang korte ang isa pa ka motion ni Neri nga i-withdraw ang information of the case.
Sa statement sang kampo sang aktres, ginsiling nga gina-abi-abi gid ang court order sa iya release kag nagalaum nga malimpyuhan ang iya pangalan sa himuon nga reinvestigation.
Nahibaluan nga nangin endorser kag franchisee ni Neri sang Dermacare – Beyond Skin Care Solutions nga nagapangatubang man sang alleged violation sang Securities Regulation Code.
Sang September 2023, nakapaguwa sang advisory ang Securities and Exchange Commission (SEC) batok sa kumpaniya bangud indi ini otorisado nga mag-solicit sang investments bangud indi ini rehistrado kag wala sang lisensya nga magbaligya sang securities.
Sang amo man nga tuig, ginklaro ni Neri nga indi na siya affiliated sa Dermacare kag ang anuman nga transaction nga nagagamit sa iya pangalan ang indi authorized kag ginhimo lamang nga wala sang pahanugot halin sa iya.
