Nagpahanumdom ang National Grid Corporation of the Philippines sa publiko nga indi pagtugutan nga magpalupad sang burador ang mga kabataan malapit sa mga transmission lines, tore, substations, kag iban pa nga pasilidad sang NGCP.
Suno sa NGCP, sa tion sang summer season, nagapadayon ang pagdamo sang insidente nga ang mga burador nagasangit sa linya sang kuryente ukon nagasulod pa sa mga substations.
Ini nga mga hitabo mahimo magdala sang tripping, gulpi nga pagkadula sang kuryente, kag peligro sa publiko.
Ginapangabay man sang NGCP ang mga lokal nga panguluhan nga palig-onon ang pagpatigayon sang anti-kite flying campaign agud malikawan ang problema sa padayon nga suplay sang kuryente kag magapabilin nga hilway ang komunidad.
Dugang sang NGCP, ang ini nga mga aktibidad ang hugot nga ginadumilian sa idalom sang Anti-Obstruction of Power Lines Act.
