Ginpanawagan ni Msgr. Meliton Oso sa mga employer sa Western Visayas nga i-implementar ang minimum wage increase nga amo ang gin-aprubahan sang National Wages and Productivity Commission.
Kabahin ini sang iya sermon sa Jaro Metropolitan Cathedral sang ginpahangop sini sa mga tumuluo nga indi dapat pagpabungul-bungulan ang hustisya, bangud ang pagkamatarong ukon paghatag sang hustisya amo ang kinahanglan antes mangin maalwan.
Nahinambit niya ini sa konteksto nga ang pagkamaalwan amo ang isa sa mga pamatasan nga dapat ikabuhi sang katawhan bilang espiritwal nga pagpanghanda sa ‘end of time.’
Suno kay Msgr. Oso, tuman ka damo ang nagapalapit sa Jaro Archdiocesan Social Action Center (JASAC) nga nagapabutyag kaangot sa ila nga mga benepisyo nga wala man gina-remit sang ila employer.
“By justice, obligasyon naton ini, ilabi na gid sang Christian employer,” suno kay Msgr. Oso. “Indi pagtawga ang imo kaugalingon nga Kristyano kun pabungol-bungulan mo man lang ang gina-demand sang hustisya.
Dugang pa sini: “The Office of the Social Action has already an instruction, ‘give more than what is demanded by the Tripartite Wage Board.’ Kapigado sang pangabuhi. Kaluluoy ang mamumugon.”
Nahibaluan nga epektibo na sa Nobyembre 19 ang P40 tubtub sa P45 minimum wage increase para sa mga mamumugon sa pribado nga sektor sa rehiyon.
Una na nga ginpahayag sang Regional Tripartite Wages and Productivity Board-6 nga apisar sang mga apelar halin sa employer groups nga i-defer anay ang wage increase, nag-isyu sila sang bag-o nga wage order agud proteksyunan ang mga mamumugon samtang ginasigurado man nga makapadayon sa pag-operate ang mga negosyo.
