ILOILO CITY – Magapatigayon sang pagsinapol ang Iloilo City Disaster Risk Reduction and Management Council agud istoryahan ang problema sa water distribution sa syudad.
Sa interview sang Bombo Radyo kay Engr. Niel Ravena, pinuno sang Iloilo City General Services Office, iya ginpahayag nga napaslawan sila nga maka-deliver sang 500,000 liters nga tubig kada adlaw sa pito ka mga distrito sa syudad.
Isa sa mga ginatumod nga rason amo nga wala sang stand ang tangke sang ila tubig sa pila ka mga barangay.
Ini nga tubig ang kabahin sang “Oplan Bulig Tubig Sa Syudad” kag indi pa kabahin diri ang mga ginpang-donar nga tubig sa local government unit.
Suno kay Ravena, 500,000 liters kada adlaw kuntani ang ila target nga irasyon sa pito ka mga distrito sa syudad.
Sa nasambit nga numero, 70% ang magahalin sa South Balibago Waterworks kag 30% naman ang halin sa Metro Pacific Iloilo Water.
Ini ang ginalauman nga matapos kuntani sa sulod sang tatlo ka bulan ukon 90 ka adlaw.
