Ginbasura sang konseho sa first reading ang ordinansa nga luyag tani nga i-duso ni Vice Mayor Love Baronda kadungan sang 23rd Regular Session sang Sangguniang Panlungsod subong nga adlaw.
Ang ordinansa may titulo nga “Proposed ordinance establishing the official logo, office address and communication channels and correspondence protocol of the Sangguniang Panlungsod (SP) of Iloilo City, providing for their management and use thereof.”
Suno kay Baronda, katuyuan kuntani sang ordinansa nga may yara sang opisyal nga logo ang konseho, opisyal nga address, kag communication kag protocols bangud isa ini ka requirements sang Department of th Interior and Local Government (DILG).
Matapos wala ini ginsuportahan sang mayorya, nag-apelar si Baronda nga i-reconsider sang mga kaupod nga opisyal gani nga ginhatagan ini sang kahigayunan nga ipresentar liwat sa masunod nga session sa konseho.
Ginsiling naman ni Majority Floor Leader Councilor Rex Marcus Sarabia, wala sang official logo sa ginduso nga ordinansa sang bise-alcalde rason nga wala nila ini ginsuportahan.
Ginpakamaayo man sang konseho nga ipasar liwat ini sang bise alcalde kun may picture na sang official logo sa iya ordinansa.
Nagserbe man nga presiding officer si Councilor Sheen Marie Mabilog sa reading sang ordinansa.
