Ginakonsiderar sang Department of the Interior and Local Government nga magtanyag sang P10-million nga reward para sa impormasyon nga magaresulta sa pag-aresto kay Atong Ang.
Si Ang nagapangatubang sang arrest warrants may kaangtanan sa kaso sang missing sabungeros.
Suno kay DILG Secretary Jonvic Remulla, ini agud ma-pressure si Ang nga magsungka sa otoridad.
Ginpahayag ni Remulla, nga yari pa sa Pilipinas si Ang base sa monitoring sang ahensya.
Nagasentro naman ang otoridad sa area sang Luzon.
Para kay Remulla, si Ang ang ginakabig nga “armed and dangerous” bangud sa involvement sini sa pagpatay sa masobra 100 ka tawo kag ang pag-angkon sini sang madamo nga bodyguards.
Ginsiling naman ni Remulla nga handa ang otoridad kun magbato si Ang kun arestuhon ini.
Sa subong, hugot ang monitoring sang Philippine National Police sa mga airports kag seaports sa bilog nga pungsod agud mapunggan ang possible pagpalagyo sini pagwa sang Pilipinas.
Ginmando man ni PNP acting chief Police Lieutenant General Jose Melencio Nartatez Jr. ang hugot nga koordinasyon sa immigration authorities bilang kabahin sang manhunt batok kay Ang.
Si Ang ang nalakip sa 18 ka akusado nga may arrest warrant naangot sa missing sabungeros.
Nagapangatubang ini sang 15 counts of kidnapping kag serious illegal detention kag four counts sang kidnapping with homicide.
Ang 17 ka mga akusado ang yara na subong sa kustodiya sang mga pulis.
