May gintanyag nga P100,000 bilang reward sa sin-o man nga makatudlo sa suspek nga nagpatay sa 57-anyos nga radio broadcaster nga si Juan Jumalon ukon DJ Johnny Walker sa Calamba, Misamis Occidental.
Sandig ini sa anunsyo sang Presidential Task Force on Media Security kun sa diin nakabutang man ang computerized facial sketch sang itsura sang lalaki nga amo ang ginatudlo nga nag-serbe nga lookout malapit sa gate nanday Jumalon.
Ginlaragway sang pulis ang lalaki nga may medium build, 5 feet 5 inches tubtub 5 feet 6 inches ang kataason, kag ginabanta 70 kilograms ang kabug-aton. Nakasuksok ang suspek sang pula nga kalo, green nga shirt, kag itom nga shorts sandig sa nakuha sang CCTV footage.
Pasado ‘las singko sang kaagahon sang Domingo sang ginsulod sang suspek ang radio booth sa sulod mismo sang balay ni Jumalon.
Ginpalapitan sini ang radio anchor, ginluthang, kag madasig nga nagpalagyo.
Suno sa asawa sang biktima, wala naga-isahanon ang suspek bangud duha sila ang nagsulod sa balay kag may isa nga amo ang nagabantay sa guwa kag nagasakay sa motorsiklo.
Nagapati man ang asawa nga indi work-related ang rason sa krimen bangud indi commentator si Jumalon kundi nakatutok lamang sa entertainment ukon isa ka disc jockey nga nagabasa sang greetings kag mga public service.
Wala ginadula sang otoridad ang tanan nga posible anggulo lakip na ang away sa duta kag away sa negosyo. #
