ILOILO CITY – Ginapanawagan ni Iloilo City Mayor Jerry Treñas sa Department of Transportation (DOTr) kag Civil Aviation Authority of the Philippines (CAAP) nga padasigon na ang paggamit sang P190 million nga pondo halin sa gobyerno para sa construction, rehabilitation, kag improvement sang Iloilo International Airport.
Nahibaluan nga ang Iloilo International Airport ang isa sa mga paluparan sa pungsod nga nakabaton sang pondo sa idalom sang 2024 General Appropriations Act.
Sa interview sang Bombo Radyo kay Treñas, iya ginpahayag nga ang nasambit nga pondo ang bangud man sa pagpaninguha ni Senator Grace Poe, nga amo ang nagapungko bilang chairman sang Senate Committee on Public Services.
Suno kay Treñas, lakip sa mga problema sa paluparan amo ang wala naga-function nga air-conditioning systems kag escalator.
Nagalaom man ang alkalde nga sa idalom sang Public-Private Partnership, mas mapaayo pa ang sitwasyon sang paluparan.
Samtang, ginkumpirma sang alkalde nga nakahanda naman nga magbaton ang Iloilo International Airport sang international flights.
