ILOILO CITY – Ginpanawagan ni Senator Joel Villanueva sa mga revenue-generating agencies nga pwersahon ang mga Philippine Offshore Gaming Operators (POGO) nga magbayad sang ila buwis nga ginabanta magadangat sa P50 billion.
Ang panawagan ni Villanueva ang kasunod man sang pagpangita sang gobyerno sang kwarta agud ibulig sa mga naapektuhan sang Super Typhoon Rolly.
Suno sa senador, nagakadapat nga siguraduhon sang Bureau of Internal Revenue (BIR) nga tanan nga pending taxes nga balayran sang POGO ang makolekta na antes i-shut down sang gobyerno ang ila operasyon.
“Paubos na raw po ang ating pondo para sa mga biktima ng mga Bagyong Quinta at Rolly. Dapat pong mas maging determinado ang ating BIR na habulin ang utang ng mga POGO na nagkakahalaga ng P50 bilyon dahil magagamit natin ito pangtustos sa mga pangangailangan ng mga biktima ng bagyo,” pahayag sang senador.
“Move on na lang ba tayo sa pagkakautang ng mga POGO? Kahit po nagsasara na ang ilan sa mga POGO, dapat siguruhin ng BIR na sisingilin ng tamang buwis bago payagan isara ang kanilang mga negosyo,” dugang pa ni Villanueva.
Gintumod ni Villanueva ang standby nga pondo sang Department of Social Welfare and Development nga nagadangat lang sa P254.35 million.
Nagalaom naman ang senador nga padayunon ni Department of Finance Secretary Carlos Dominguez III ang pagduso sa mga revenue-generating agencies nga magkolekta sang wala mabayaran nga mga buwis.
“Now more than ever, we need to plug tax leaks because the lives of the displaced depend on the assistance to our government. We cannot and we should not fail them,” pahayag ni Villanueva.
