ILOILO – Lakip sa gina-monitor sang 3rd Infantry Division ang ginapahayag miyembro sang New People’s Army (NPA) nga gin-serbehan sang warrant of arrest sa banwa sang Janiuay, Iloilo bangod sa duha ka kaso nga Rebellion kag isa ka kaso sang Use of Fictitious Name.
Ang arestado amo si Karma John Suarez alyas Ka Fred ukon Dennis, residente sang Brgy Coto, Lambunao, Iloilo, kag lider sang Igabon Platoon sang KR Panay- Central Front.
Sa interview sang Bombo Radyo kay Capt Cenon Pancito III, spokesperson sang 3rd Infantry Division sang Philippine Army, iya ginpahayag nga ang pag-aresto sa suspek ang ginakabig nga isa ka kadalag-an sa bahin sang law enforcement agencies.
Si Suarez ang ginatudlo nga isa sa mga nag-raid sa Maasin Municipal Police Station sang Hunyo 2017.
Nahibaluan nga nadakpan ang suspek sang Domingo sa FY Armada St., Brgy. Aquino Nobleza West, Janiuay, Iloilo, kag nahibaluan man nga ginagamit ni Suarez ang ngalan nga Joseph Pinuela y Estandarte, 34 anyos, residente sang Brgy. Conaynay, Sta. Barbara, Iloilo.
