Ginpabutyag sang isa ka legal expert nga ang pag-appoint ukon pag-designate sang mga elected officials sa posisyon sa gobyerno, posible nga may conflict of interest kag paglapas sa konstitusyon, nga nagahatag sang kabalaka sa legalidad sang mga ginahimo sang Independent Commission for Infrastructure (ICI) sa tunga sang ginapatigayun nga imbestigasyon sa maanomaliya nga flood control scandal.
Sa interview sang Bombo Radyo kay Atty. Noel Palomado, ginpahayag niya nga base sa ila pagtan-aw, may probisyon sa konstitusyon nga klaro nga nagadumili sa mga elected officials nga ma-appoint ukon ma-designate sa bisan ano nga kapasidad sa gobyerno.
Suno sa iya, ini nga sitwasyon ang nagahatag sang legal nga kabalaka kag ginakabig nga conflict of interest, ilabi na sa kaso ni Mayor sang Baguio City nga si Benjamin Magalong nga gindesignar bilang special adviser sang ICI.
Dugang pa ni Atty. Palomado nga samtang ginapanawagan sang pumuluyo ang masanag kag matuod-tuod nga imbestigasyon sa flood control scandal, nga ginakabig nga may kaangtanan sa mga ginatawag nga insertions sa proyekto nga ginadudahan nga may koneksyon sa pila ka mga senador, sanday Joel Villanueva, Jinggoy Estrada kag Chiz Escudero.
Ginpahayag man ni Atty. Palomado nga ginahulat pa sang publiko ang resulta sang imbestigasyon sang ICI, kag wala pa sang klaro nga direksyon kon sa diin padulong ang mga findings.
Ginapaabot man ang mga audit procedures, audit program kag fraud audit halin sa Commission on Audit (COA), apang wala pa sang may mabatian nga update ukon resulta halin sa nasambit nga ahensya.
Padayon ang panawagan sang pumuluyo para sa hustisya kag kasanag sa likod sang ginadudahan nga korapsiyon sa Department of Public Works and Highways (DPWH), kag ginahingyo nga ang mga ahensya sang gobyerno magpatigayon sang matuod-tuod nga tikang agud maprotektahan ang pondo sang pungsod kag ang interes sang publiko.
