Ginsulit sang lloilo City Police Office (ICPO) ang mandu sini sa mga police stations sa syudad nga hugudan pa gid ang pag-patrolya kag pag-conduct sang checkpoint agud madakpan ang mga tawo nga nagadala sang armas kag posible maghimo sang krimen.
Kasunod ini sang duha ka magkasunod nga shooting incidents sa syudad (sa Calaparan, Arevalo kag sa Ticud, Lapaz) kun sa diin lunsay patay ang mga biktima kag ligom-dulom naman ang mga pulis kun sin-o ukon sanday sin-o ang suspek.
Sa interview sang Bombo Radyo kay ICPO Director Pol. Col. Leo Batiles, ginpahayag sini nga dapat id-idon gid sang pulis ang random checkpoints agud nga mag-andam ang mga motorista kag madakpan ang mga tawo nga potensyal maghimo sang krimen.
Tutukan ini sang pulis ilabi na bangud nakalusot gihapon ang suspek sa amo nga mga krimen apisar sang election gun ban nga ginapatuman subong tubtub sa Hunyo 8.
Suno kay Batiles, indi lang basta nga patrolya ang himuon sang pulis, kundi Operation Bakal, kun sa diin pwede ini nga makapatigayon sang on-the-spot inspection sa highly-suspicious nga persona ukon lugar.
