Tinguhaan sang Iloilo Provincial Government nga mahatag ang tag-P25,000 nga Collective Negotiation Agreement Incentive (CNAI) sang mga regular employees subong nga bulan sang Disyembre.
Kabug-usan nga P35,250,000 ang pondo sang probinsya para sa sini nga Appropropriation Ordinance No. 2022-03 nga gin-aprubahan sang Iloilo Provincial Board.
Sa interview sang Bombo Radyo kay Mr. Joecil Mayor, Presidente sang Association of Iloilo Provincial Government Employees, iya ginpahayag nga 1,410 ka mga empleyado ang mahimo makabaton sang nasambit nga bonus.
Regular employees lamang sang provincial capitol ang makabaton sang P25,000 kag indi kuwalipikado ang job hires kag contractual employees bangud wala sang employer-employee relationship.
Kuhaon ini nga kantidad sa savings sa idalom sang Maintenance and Other Operating Expenses – Calendar Year 2022.
Gin-athag man ni Mayor nga may batunon man nga bonus ang mga empleyado sang district hospitals apang sandig ini sa individual savings nga na-generate sang individual hospital sa probinsya — buot silingon, ang kantidad ang indi kaangay sa mabaton sang mga taga-kapitolyo.
Magluwas sa CNAI, gina-proseso man ang Productivity Enhancement Incentive balor P5,000 sa kada empleyado sang provincial government.
Ginahulat man kun may ipaguwa nga bag-o nga guidelines para sa pag-release sang Service Recognition Incentive.
