Pag-relieve sa PRO VI Director, wala sang labot sa manhunt kay Bato —spox

Wala sang kaangtanan ang pag-relieve kay former Police Regional Office (PRO) 6 Director PBGen Josefino Ligan sa direktiba nga ginhatag sang Department of Justice (DOJ) sa Philippine National Police (PNP) nga arestuhon si Senator Ronald “Bato” Dela Rosa.

Gin-athag ini sang PRO VI matapos ang pagkakas kay Ligan epektibo subong nga adlaw, Mayo 22, kag pag-assign sa iya bilang Deputy Chief of Operation sa Directorate for Operations sa headquarters.

Ang ginbulos naman kay Ligan sa Western Visayas amo si PBGen. Randulf Torres Tuaño nga amo ang outgoing chief sang Public Information Office sang PNP.

Ginpaguwa ang order of relief sa mismo adlaw nga ginmandu man sang DOJ sa PNP kag sa National Bureau of Investigation (NBI) nga dakpon si Dela Rosa nga subong makabig na nga fugitive from justice.

Ini ang rason nga nagguwa man ang espekulasyon kun may labot bala ang balasahay sang PNP officials sa estratehiya agud maaresto si Dela Rosa nga amo ang former PNP Chief.

Sa interview sang Bombo Radyo kay Police Major Lailyn Sencil, spokesperson sang PRO VI, iya ginpahayag nga isa ka regular administrative process sang mga kapulisan ang reassignment agud masiguro nga mapabilin ang epektibo nga pagserbisyo sa komunidad.

Suno sa iya, ang reassignment ni Ligan ang kabahin man sang iya nga career advancement.

Wala pa sang eksakto nga schedule subong kun san-o ang pag-abot sang bag-o nga director sang PRO 6.

Dugang pa ni Sencil, wala pa na-istoryahan sa bahin sang mga Provincial Director kun may yara man sang reshuffling kasunod sang pagbag-o sang director sa Rehiyon VI.#