Pangitaan sang paagi sang Iloilo City Council kun paano ma-subsidize ang rental fee para sa mga kiosko kadungan sang Dinagyang Food Festival sa masunod nga tuig.
Kabahin ini sang posible nga adjustments nga himuon kasunod sang mga feedback sang festivalgoers subong nga tuig nga mahal ang renta sang mga manugbaligya gani nga mahal man ang presyo sang mga baligya.
Sa interview sang Bombo Radyo kay Majority Floor Leader Rex Marcus Sarabia, iya ginpahayag nga posible nga sabton sang syudad ang katunga ukon porsyon sang operating expenses.
“Lantawon ta kun ano ang maayo ah,” suno kay Sarabia.
Nahibaluan nga sa apat ka adlaw nga Dinagyang Food Festival, ginabanta 270 ka stalls ang ginplastar nga nagaunod sang food kag non-food items. Nagbayad ang mga manugbaligya sang tag-P18,000 para sa renta.
Sandig naman sa mga tag-iya sang mga kiosko, bangud mataas ang ila renta, nagpasaka man sila sang presyo sang mga produkto.
Una naman nga ginpahayag sang Iloilo Festivals Foundation, Inc. (IFFI) nga ginatun-an man ang posible nga pagbuhin sang rental fee sa food kiosks lakip na ang nasambit nga subsidies nga posible nga sabton sang Iloilo City Government.
Sa nauna nga pahayag ni IFFI chairman Judgee Peña, nakasaad nga nagsaka ang rental fees sa mga kiosko sang ginabanta P1,000 subong nga tuig bangud sa limitado lamang nga numero sang stalls nga ginpasugtan agud nga wala sang pagginutok, makalabay ang pedestrians, kag mapabilin nga maayo ang crowd control sa nagapanguna nga festival areas.#
