Gindeklarar sang Philippine Atmospheric, Geophysical and Astronomical Services Administration (PAGASA) nga opisyal na nga nagtakop ang southwest monsoon ukon habagat season.
Ginpahayag ini sang state weather bureau matapos nga nabantayan ang pila ka pagbag-o sa panahon lakip na ang pagbaskog sang high-pressure system sa East Asia kag ang pagbalhin pakadto sa south sang Intertropical Convergence Zone (ITCZ).
Na-monitor man sang ahensya ang pagluya sang hangin kag pagbuhin sang ulan nga dala sang habagat gani gin-anunsyo nga tapos na ang rainy season sa nakatundan nga bahin sang Luzon kag Visayas.
Apisar tapos na ang habagat season, posible gihapon ang pag-ulan sa pila ka lugar sa southern Philippines bangud sa epekto sang tropical cyclone nga yara sa guwa sang Philippine Area of Responsibility (PAR).
Katapusan nga nakit-an ang Super Typhoon Choi-wan sa kalayuon nga 2,605 kilometro east-northeast sang extreme northern Luzon dala ang kabaskugon sang hangin nga 195 kilometro kada oras kag pagmadlos nga nagalab-ot sa 240 kilometro kada oras.
Suno sa PAGASA, manubo ang tyansa nga magsulod sa PAR ang bagyo bangud nagapadayon ini sa paghulag pa-naaminhan sa kabaskugon nga 20 kilometro kada oras.
Ang trough ukon extension sang Choi-wan ang ginapaabot nga magdala sang magal-om nga kalangitan, mga pag-ulan kag thunderstorms sa Mindanao, Western Visayas, Negros Island Region, Central Visayas, Leyte kag Southern Leyte.
Samtang, partly cloudy tubtob cloudy nga kalangitan ang posible maeksperyensyahan sa Metro Manila kag sa iban pa nga bahin sang pungsod, upod ang lapta-lapta nga pag-ulan ukon thunderstorms bangud sa localized thunderstorms.
