Nagpaandam ang state weather bureau sang posible nga mga pagbaha kag pagtiphag sang duta sa Visayas apisar nga sa Northern kag Central Luzon magalaslas si Super Typhoon Uwan kun makasulod na ini sa Philippine Area of Responsibility (PAR).
Sa interview sang Bombo Radyo kay Dr. Nathaniel Servando, administrator sang Philippine Atmospheric, Geophysical and Astronomical Services Administration (PAGASA), ginlaragway sini ang Bagyo Uwan bilang “very intense” kag “enormous” nga sahi sang bagyo.
“Kun ibutang naton ang bagyo sa Metro Manila, masakop ya ang Batanes at sa south maabot ya hanggang Zamboanga. Basically, masakop ya ang bilog nga Pilipinas, except ang sa southernmost portion. Ganon kalawak ang sirkulasyon,” suno kay Servando.
Bangud sang kalaparon sang sirkulasyon sang bagyo, ginalantaw sang PAGASA nga magadala ini sang ulan sa mga area sa Visayas nga bag-o lang gin-agyan ni Bagyo Tino.
Ginpaathag man sini nga bangud “saturated” na ukon tuman na ka basa ang duta bangud sa naglabay nga bagyo, dapat nga mag-alerto gid ang mga pumuluyo.
“Dahil nga saturated na ang duta, posibleng magdala [ng hiindi lang baha] but of course landslides and mudslides,” dugang sini.
Panawagan pa ni Servando — nga tumandok man sang Iloilo — nga mag-aligmat gid kag magpamati sa mga abiso sang DOST-PAGASA kag sa mga kaangot nga ahensya.
Alas singko kaina sang hapon, bisan nga yara pa sa guwa sang PAR, ginhatagan na ang bagyo sang local name nga Uwan kag nag-anunsyo naman ang PAGASA sang wind signals.
Lakip sa Signal No. 1 amo ang northeastern portion sang Iloilo lakip ang Carles, Estancia, Balasan, San Dionisio, Concepcion, Batad, Sara, kag Ajuy.
“Malawak ang kaniyang sirkulasyon. May radius ito na about 700 kilometers yung rainband niya… kaya nag-announce na ng wind signals,” pahayag ni Servando.
Sa track forecast, ini nga bagyo ang magasulod sa PAR karon sa gab-i ukon sa buwas sa kaagahon.
Gina-forecast sang PAGASA nga maga-landfall ini sa southern portion sang Isabela ukon sa northern portion sang Aurora sa Domingo sang gab-i ukon sa Lunes sang kaagahon.
Pagkatapos sang landfall, magaagi si Uwan sa kabukiran sang Northern Luzon kag magatuhaw sa West Philippine Sea sa Lunes sang aga ukon sa hapon.
Sa bahin sang kabaskugon sini, gina-forecast nga mas magabaskog ini kag magadangat sa typhoon category sa masunod nga 24 oras kag super typhoon category buwas sa gab-i ukon sa Domingo sa aga.
Posible man ini nga mag-landfall kun yara na ukon malapit na sa peak lifetime intensity.
Base pa sa PAGASA, ang paglabay sini sa Luzon ang makapahina sa pwersa sini, apang ginalantaw nga magapabilin bilang typhoon samtang yari ini sa Pilipinas.
Si Uwan amo ang ika-duha nga bagyo sa PAR subong nga Nobyembre kasunod sang paglaslas ni Tino.
(Photo from Himawari-8/9 satellite of Japan Meteorological Agency)
