ILOILO CITY- Indi pabor ang pila ka mga opisyal sang syudad natuhoy sa ginaduso nga ideklarar ang mga katapo sang Communist Party of the Philippines-New People’s Army (CPP-NPA) bilang persona non grata sa Iloilo City.
Sa interview sang Bombo Radyo kay Iloilo City Councilor Jojo Javellana, chairman sang committee on Peace and Order sa konseho, iya ginpahayag nga indi na ini kinahanglan bangud makabig nga white area ang syudad sang Iloilo.
Ini nagakahulugan nga wala sang kalakasan nga ginpatigayon sa syudad ang rebelde nga grupo kag wala man sang pagpamahog sa internal security.
Panugyan ni Javellana nga mas pasangkaron na lang sang kapulisan ang paghatag seguridad sa mga pumuluyo sa syudad.
Matandaan nga ginahingyo ni Pol. Col. Martin Defensor Jr., director sang Iloilo City Police office sa Iloilo City Council nga magpasar sang resolusyon nga magadeklarar sa Communist Party of the Philippines-New People’s Army (CPP-NPA) bilang persona non grata.
