ILOILO CITY – Gin-athag sang Local Economic Enterprise Office nga normal lamang nga proseso ang ginahimo nga pagdeklarar nga bakante ang stalls nga “abandoned and delinquent.”
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga madugay na nga ginplano sang Iloilo City Government ang liwat nga pagtukod sang komitiba sa merkado apang ini ang wala sang kahilabtanan sa plano nga Public Private Partnership sa Iloilo Central Market kag Iloilo Terminal Market.
Suno kay Castañeda, ginahulat na lang niya ang report sang mga market in charge sa nasambit nga mga merkado agud makahimo sang rekomendasyon sa tion nga kompleto kag verified na ang data.
Ginpahayag man ni Castañeda nga samtang ginapatigayon ang adjudication process, may yara sang preferential application ang mga manugbaligya nga nagatinir sa stalls nga wala nila ginapanag-iyahan.
Nahibaluan nga sa idalom sang nasambit nga proseso, igadeklarar nga bakante ang mga “abandoned and deliquent” stalls sa mga merkado agud mahimo pa magamit sang iban.
