Ginalauman sang Department of Agriculture nga maganubo na ang presyo sang mga utanon samtang maayo na ang lakat sang panahon.
Suno sa DA, nagtaas ang presyo sang mga utanon sang nagligad bangud sa tuman nga pag-ulan nga nakaapekto sa mga ginatamnan sini sa Central kag Southern Luzon, Cordillera, kag iban pa nga agricultural areas.
Ginabanta nga naglab-ot sa 50,000 ka mga mangunguma ang naapektuhan sang bagyong Luis, Maymay kag Habagat kun sa diin nagbilin sang masobra 1.7 billion pesos nga danyos sa sektor sang agrikultura.
Pahayag pa sang ahensya magabilin nga igo ang suplay sang bugas apisar sa mga epekto sang bagyo sa mga parayan.
Padayon naman ang operasyon sang masobra 900 KADIWA outlets agud buligan ang mga mangunguma kag masiguro ang padayon nga suplay sang pagkaon sa mga manugbakal.
