Pagpamatay sang layaw nga ido sa mga sapat sa Guimaras, gindangop na sa DA

ILOILO CITY – Ginpalab-ot na sang barangay officials sang Tastasan, Buenavista, Guimaras sa Department of Agriculture (DA) Region 6 ang tuhoy sa mga ido nga nagapamatay sang kasapatan sa lugar.
Suno kay Punong Barangay Ricardo Gabales, naglab-ot na sa 21 tanan ka nga kasapatan ang ginpamatay sang ginapahayag dalagko nga ido.
Nagpatrolya man ang mga pulis sa lugar kag gin-kordon ang lugar apang nakapalagyo ang mga ido.
Sa liwat nga pag-atake, nakita nga apat na ka ido ang nagapamatay sa mga kasapatan nga ginahigot sa talamnan.
Ipaidalom naman sa autopsy examination sang Department of Agriculture ang napatay nga mga sapat.
Suno kay Dr. Jonic Natividad sang Quarantine Laboratory sang DA-6, mahimo nga wild dog ukon layaw nga ido ang nagapamatay sang kasapatan.
Sa pihak sini, kinahanglan nga ipaidalom sa pagtu-on ang napatay nga mga sapat agud masiguro kun layaw nga ido gid man ang nagapamatay.