Ginapangabay sa gihapon ang mga residente sa probinsya sang Guimaras nga padayunon ang pagsuksuk sang face mask sa indoor man ukon outdoor areas apisar nga may yara na sang Executive Order No. 3 si Presidente Bongbong Marcos nga nagapahanugot sang boluntaryo lamang nga pagsuksuk sang face mask sa outdoor settings.
Sa interview sang Bombo Radyo kay Vice Governor Atty. John Edward Gando, iya ginpahayag nga wala pa naamyendaran ang Provincial Ordinance 2020-04 ukon ang new normal ordinance.
Nakasaad sa sini nga ordinansa ang mandatory nga paggamit sang face mask sa pampubliko nga mga lugar kag workplaces sa tanan nga tion.
Apang suno kay Gando, may inisyal na nga naistoryahan upod kay Governor Rahman Nava nga may pagsinapol nga himuon agud nga may pagbag-o nga ibalay sandig sa bag-o nga executive order sang presidente.
Ginpasalig man sang bise-gobernador nga sa pagsapol sang Sangguniang Panlalawigan, hatagan gid sang daku nga bug-at ang pahayag sang health authorities.
Sa subong suno kay Gando, mataas ang Covid-19 vaccine coverage sa Guimaras sa first kag second doses, apang may ginapangatubang nga pagpanghangkat sa pag-rollout sang booster doses.
Ginatinguhaan man sang probinsya nga makahimo sang dugang nga estratehiya agud nga malab-ot ang target kag masuportahan ang PinasLakas campaign sang Department of Health (DOH). ##
