Ginpanginwala sang World Health Organization (WHO) nga sila ang nagpagwa sang pahayag nga ang Pilipinas ang may “fastest rise” ukon may pinakamadasig nga pagsaka sang kaso sang coronavirus disease (COVID-19) sa Western Pacific region.
Suno kay World Health Organization Country Representative to the Philippines Dr. Rabindra Abeyasinghe, wala sang kaangay nga assessment nga ginhimo ang pamunuan kag wala sini ginpaanggid ang Pilipinas sa iban nga pungsod.
Gindayaw man ni Abeyasinghe ang akto sang pungsod sa diin partikular nga gintumod ang temprano nga pagpatuman sang lockdown nga amo suno sa iya ang nakabulig agud malikawan ang posible pagdamo sang patay kag infected.
Sa pihak sini, ginpahayag sang opisyal nga kinahanglan pauswagon sang Pilipinas ang pagpaninguha para sa contact tracing.
Suno pa sa natungdan, nagadala sang daku nga kahangawa ang mga tawo nga wala wala nagapati sa guidelines kag protocol nga ginamandu sang Department of Health.
