Ginalauman sang pamilya nga mas mapadasig pa ang imbestigasyon sa kaso sang brutal nga pagpatay kay Claire Diergos bangud sa kaangtanan sini sa isa ka myembro sang Presidential Security Group (PSG).
Pakaisa ni Claire si Police Captain Trisha Marie Diergos, ang close-in security ni Honeylet Avanceña, ang common law wife ni Presidente Rodrigo Duterte.
Sa interview sang Bombo Radyo kay Samuel Diergos, amay ni Claire, iya ginpahayag nga ginahulat subong ang pag-abot sang amo nga PSG member.
Nag-file ini sang leave suno sa natungdan kag hulaton sang pamilya antes ilubong si Claire sa Nobyembre 7 sa Old Poblacion Cemetery sa Buenavista, Guimaras.
Suno sa amay, mahimo nga ipalab-ot ni Police Captain Diergos kay Presidente Rodrigo Duterte ang kaso sa pagpatay kay Claire, kag posible nga mas mahatagan ini sang mas madasig nga kasanagan.
Ginkumpirma man sang amay nga kahapon sa punerarya, may mga Ilonggo members man sang PSG nga inisyal nga nakapakigkita sa ila nga pamilya, apang “wala pa sang naistoryahan”.
Kahapon lang sang gindala si Claire sa ila puluy-an sa New Poblacion, Buenavista. Tatlo ka anggulo ang ginasundan sang mga pulis kaangot sa pagpatay sa biktima: robbery with homicide, jealousy ukon pagpangimon, kag utang nga kwarta.
