Paano bala kun ang imo ginatago nga sekreto, mahibaluan lang bangud sang isa ka palpak nga pagbayad sang bulong?
Isa ka lalaki sa China ang nabuking sang iya asawa matapos nga nagtuyo siya nga magbakal sang contraceptive pills sa isa ka botika paagi sa e-payment.
Apang nagka-aberya ang sistema, gani ginpanawagan sang staff ang numero nga nakalista sa iya membership card, nga sang ulihi, na-link gali sa iya misis. Hala ka!
Nagkabalaka ang asawa sang nahibaluan niya ngaa birth control pills ang ginbakal sang iya bana, nga wala man siya nagagamit sini.
Diri na nagwa ang kamatuoran nga may ‘other woman’ ang iya nga bana.
Subong, ang amo nga lalaki nagareklamo sa social media kag ginabasol ang botika sa pagkaguba sang duha ka pamilya.
Ginpahayag pa niya nga plano niya kasuhan ang botika bangud sang ginatawag niya nga paglapas sa privacy.
Apang suno sa mga legal expert, gamay ang posibilidad nga magdaog siya sa kaso. Ginpunto pa sang madamo nga netizens nga kun wala siya nagluib sa iya asawa, wala kuntani sang problema.
Sa subong nga panahon sang teknolohiya, bisan ang mga sekreto, indi na masarangan nga taguon.
Gani antes mamasol, pamangkota anay ang kaugalingon: tsakto ni bala ang ginahimo ko?
