Ginbuyagyag ni Baguio City Mayor Benjamin Magalong indi na gusto sang pamilya ni anay DPWH Undersecretary Maria Catalina Cabral nga ipaidalom ang bangkay sini sa autopsy.
Ini ang kabaliskaran sang nauna nga report sang Department of Interior and Local Government (DILG) nga ipaidalom na sa autopsy ang bangkay sang napatay nga anay DPWH undersecretary.
Suno kay Magalong nga anay man nagserbe bilang lider sang Criminal Investigation and Detection Group, mas maayo kuntani kun ipaidalom sa autopsy ang bangkay sang napatay nga opisyal, ilabi na tuman nga makaduluda ang iya kamatayon.
Tubtob subong, nagapadayon ang pagkwestyon kun hungod nga nagpamakamatay ang anay opisyal ukon may foul play sa iya pagkapatay.
Ini matapos ma-recover ang iya lawas sa isa ka pil-as sa syudad sang Tuba, Benguet sang Disyembre 18.
Una man nag-apelar ang Independent Commission for Infrastructure nga magpatigayon sang hugot nga imbestigasyon sa pagkapatay ni Cabral agd mahibaluan kun may yara sang foul play natabo.
Nagapadayon naman sa kustodiya sang mga otoridad ang driver ni Cabral nga si Ricardo Munos Hernandez.
Si Hernandez ang ginapatihan nga ulihi nga nakakita kay Cabral antes siya nasapwan nga patay.
