Nag-file sang hagna si Davao City 1st District Representative Paolo Duterte agud nga i-require ang “mandatory random” drug testing sa kada anum ka bulan sa elected kag appointed officials sa pungsod.
Nakasaad sa House Bill No. 10744 nga lakip ang presidente sa mga opisyal sang public office nga dapat magpaidalom sa random drug testing paagi sa hair follicle drug test.
Ginahaylo man sa idalom sang amo nga hagna ang pag-establisar sang voluntary random drug testing sa mga kandidato para sa electoral posts sa sulod sang 90 ka adlaw antes ang election day.
“Considering the initiatives towards the deterrence of drug use and abuse, exemptions or favors in the mandatory nature of random drug testing shall not extend to certain class privilege such as the elected and appointed officials, since it becomes imperative upon their own mandate that they shall lead the life of modesty and integrity,” pahayag sini sa iya explanatory note.
Suno sa hagna, ang elected ukon appointed officials nga magpositibo sa test ang dapat nga ma-suspend ukon pahalinon sa posisyon.
Matandaan nga antes ini nga hagna, ang amay ni Cong. Paolo nga si anay Presidente Rodrigo Duterte ang naghangkat mismo kay President Ferdinand Marcos, Jr. nga magpaidalom sa hair follicle drug test agud mapamatud-an nga indi siya adik.
Ang komento sang anay presidente ang kasunod man sa naglapta nga video kun sa diin may isa ka tawo nga halos kapareho ang itsura kay Marcos nga nagagamit sang illegal drugs — butang nga ginpakamalaot naman sang mga opisyal, gintawag nga deepfake, kag ginkabig nga hungod nga tikang agud nga mapaluya ang Marcos administration.
