Pari nga ginareklamo sa pagka-suplado kag pagpanigarilyo, ginpahalin sa parokya

ILOILO CITY – Boluntaryo nga naghalin sa iya parokya sa banwa sang Guimbal, Iloilo ang isa ka pari nga ginreklamo bangud sa ginaalegar pagka-suplado sini kag pagpanigarilyo.
Sa interview sang Bombo Radyo, ginpahayag ni Monsignor Jomarie Delgado sang Jaro Archdiocese nga nagsumite na sang leave of absence si Fr. Abelardo Sobredo, parish priest sang San Nicolas de Tolentino Parish sa Guimbal.
Pagabuslan naman ni Fr. Ricky Gubac si Fr. Sobredo.
Sa karon kaangay nga sa floating status ang pari bangud magahulat ini sang reshuffling nga posible himuon sa bulan sang Nobyembre.
Nahibaluan nga pila ka mga deboto ang nagreklamo sa Archbishop’s Palace batok kay Fr. Sobredo bangud nga ginaakigan sini ang mga magahod, ginabayaan ang parokya kag nagapanigarilyo samtang gatambong sa mga meetings.