Wala pa sa gihapon nakilal-an ang lalaki nga nasapwan nga nagautaw-utaw sa Iloilo River nga sakop sang President Roxas, Iloilo City Proper.
Sa interview sang Bombo Radyo kay Police Staff Sergeant Alberto Espinosa, imbestigador sang Iloilo City Police Station I, iya ginpahayag nga nalibot naman sang otoridad ang kaiping nga mga barangay apang wala sang makatumod kun sin-o ang biktima..
Ang amo nga persona ang ginabanta nagaedad 25-35 anyos.
Nagasuksok ini sang green nga shorts kag maroon nga T-shirt.
Sang nakit-an ini sang construction worker, nagahabok na ang tiyan sang amo nga persona kag may pilas sa baba nga ginapatihan posible tuga sang kagat sang sapat.
Yara na ang bangkay sa isa ka punerarya sa Barangay Balabago, Jaro, Iloilo City.
Nagapanawagan ang mga pulis sa mga pamilya nga nadulaan sang himata nga magpakig-angot sa pulis agud nga ma-check kun kaangot ini sa nakit-an nga lalaki.
