Ginbuyagyag sang Pavia Municipal Police Station nga luwas sa 26 ka mga indibidwal nga nadakpan sa pauwak sa Pandac, Pavia, Iloilo, may pulo pa gid ka mga nakapalagyo.
Sa interview sang Bombo Radyo kay Police Lieutenant Gabriel Manguera, Deputy Chief of Police sang Pavia Municipal Police Station, iya ginpahayag nga nakapalagyo ang pulo ka mga persona matapos nga nagtaklas sa pader.
Suno kay Manguera, nag-agi sa likod sang pader ang mga manog-uwak bangud bakante na ini nga lote.
Gintuad man sini nga nakatalana nga ipasaka ang kaso subong nga adlaw sa mga manog-uwak kasunod sa paglapas sa Presidential Decree 1602 ukon Anti-Illegal Gambling Law.
Nagapati man ini nga kon wala man nadakpan subong ang mga nagpalagyo, mahimo sa masunod nila nga operasyon, matigayon na sila nga maaresto.
Una na nga nakabaton sang report ang talatapan nga may ginapatigayon nga pauwak sa amo nga lugar rason nga nagpatuman sila sang operasyon
Nakuha sa amo nga operasyon ang duha ka cockfighting rings, 15 ka mga manok, wall clock, duha ka syringe, kag P9,100 nga bet money.
